دی هلیهو:

مَجفَروُ آسِیمَحسِین همیطحری که سوارِ پَنگاشی بی وُ پُی یه لیتَکی هم هِی میزِه پشتِش که مثلاً هاسِی اَسوِشِه میروُنِه، تا رسی بِرَکِ ما که دم خونِی حاج عُواس نشسیدیم و هاسِی قیلون میکشیدیم، گفت راس واوین، راس واوین تا پُی اَسووُم ریتون رد نِواویدُمِه. دِی مَحلی پُی پینجَش تَک تَک دا وُ گفت وِر مِزه کَلو، اِی زَهلِی سَرتِه، نَزیک واووُ بینُم پُی چُو نونبِرشَن داغِت میکنُم یا نه! مَجفَروُ مث چی که زَهلَش رَفتُو، گفت هَع عامو نِخارُما. بعد همیطحر که مثلاً اُوسارِ اَسوِه میکَشی که ووُیسِه، یه سِیلی وُ مِنجوُ کِرد و گفت تو سی چه مث دِی یزید بالا ری کُرسی نشسیِه وُ باقی پاک ری زمین نِشسِنِه ؟ راس میگفت. پاکمون ری گِل نِشسیدیم اُما مِنجوُ یه کُرسینی زِدِی وُ اَشت ماوِینِ همه نشسه بی. مَجفَروُ گفت تونَم یا مث اونا بِشی ری زمین، یا بِدِه تا سی اوناهم کُرسی بیارِن. مِنجوُ گفت عندالله نِه زنگ بزنُم سی امرِالله تا بیا بندازِش تو مازداشگاه ! ایقِه که حَکوُ سیش گفته بازداشتگاه، بازَم می گو مازداشگاه. تموووومِ زورِش هم وَر بِچَش اَمروُوِه که گوربان دویِه وُ تو پاسگُی هلیله آشپزه.
مَجفَروُ همیطحر که اُوسارِ اَسوِشِه گرُفتِی وُ دور خوش زُر میخارد گفت خاتوُ، چه خِوَر ؟ پُی خاتوُ میشَلی بی که همیشه بحث سیاسی میکنه وُ تا یه چی می گو، مَجفَروُ هم یه اِلاپِلِنی جُواوِش میدِه. خاتوُ گفت هیچی، سخنگو دولت گفته ئی دولت خیلی گُل زده وُ حیفِه که گُلَلِش دیده نِواوِن. مَجفَروُ خندِس و گفت ئی سخنگو یا واقعاً ،،گُل،،  زده و تو هپروته وُ یا ئی که بیزُونِه دِکمِی ،،ه،، گوشیش خِراو واویده وُ وَختی میزنه ،،ه،، جاش ،،ل،، تایپ وِیموُ.
بعدش یه هُیشِ گُتی وُ اَسوِش زِه وُ خوش و اَسو تو کیچه چِهار واویدِن. مَصوُ گفت شما فهمیدین چه گفت ئی کَلوُ !؟ همه مون غیرِ خاتوُ گفتیم نه والا ! خاتوُ گفت میتَرُم جونِ حیدره بُخارُم که مَجفَروُ یه ذره هم کَلوُ نی وُ فقط خوشه زده کَلوُیی ...