
نمکو
یه باری تو طارمه پی تلویزون درازاویدهم، پامم ری پام جکندیم که یه مرتبه دختره ککام که 8 سالش بی، داخل آویی، اوقاتشم تهل بی، خیلی تهلا!!!! گو عامو، وشگفتم، ها عامو جون، چه واویده، گو امرو صو، که پی بوا رفتیدیمدم نونوا، نون بسونیم، دیدم که یه نفری پی ماشین از برک ما ردآوی و آسی بسنی می خوا، و پوس بسنیش از تو ماشین وردا تو خیابونو و ره، وش گفتم، خا عامو بعدش چه واوی، یه سیل تهلی دوارته و ما که و پی چیشلش، وم گو، می دیه بعدیم باید داشتو!!!!؟ مانه میگی سرمون واویده صدمن، گفتم ها ها ها محیط زیست محیط زیست!!، خیلی کاره اشتبینی کرده، دختره ککام گو عامو، سیچه ایقه آدمل نسبت به خوشون و محیط اطرافشون بی تفاوت آودینه و حساسیت مردم از بین رفته، وش گفتم، دس ری دلم نیل و بیو تا سیت یه داستانی تعریف کنم. میگن زمانل ناها، یه چاویبی، که مال یه زن ومردی بی و ایی زن و مرد خیلی همدیه دوس داشتنو، یه احترام خاصی سی هم قایل بیدن، صو که ویمی مردک می ره تو چاوکو، کار میکه، زنکم می ره تو خس، سی حیونلکو چی درس میکه، تو ایی چاوکو، دوتا اسب بی، یه بلانسوت شما!!! خری، گایی، سگی و یه خروس متاهلی هم بی!! تو بین ایی حیونل، یه مُشکی هم سی خوش یه جی چاوکو، یه خونه ای درس کردی و زندی میکه، یه روز مُشککو میره تو چاو، یه دوری بخاره، می وینه تا یه ماری اومده و سی خوش آسی زر می خواره،و تا مُشک دیی، سی مُشک، حمله کرد تا بخارش، ولی مُشک پا میله و فرار و تمام لارش شروع میکنه وو دروشیدن، که ایسو یا دقی دیه، مار بیا بخارش، مُشک، جلدی میره ور گاکو، وش میگو یه ماری اومد تو چاومون و بیو تا ایی مارکو از چاو، بندازیم صحرا،گاکو گو، مو رفتیدم زمینل شوم بزنم و مو ایسو حال ندارم صوا صو بیو تا بیشتر پی هم گپ بزنیم تا بینم چه میترم سیت بکنم ، مُشککو گو، صوا خیلی دیریمو، و ایسو باید یه کاری بکنیم، گاوکو گو مو ایسو حال ندارم، برو تا یکی دیه کمکت کنه، مُشک بدوخت، سرش انداخت زیرو، ره وره اسولکو، حال مقما سیشون گو، اسولکو هم گفتن ما امرو، خیلی دوسیمه و ایسو خیلی خسمون، صوا بیو تا بینم چه سیت می تریم انجام بدیم، دوارتی، ایی مُشک بدوخت سرش انداخت زیرو، رفت ور بلانسوت شما!!!!، خرکو، و ماجریه سیش گو، خرکو گو ،مو ایسو شور بوام اومده تو سرم و می خوام سیخموم زاره بدم، برو صوا بیو تا بینم چه سیت میرتم بکنم، مُشک بدوخت دوارتی سرش انداخت زیرو رفت ور خروس، و حال مقماش سی خروسم تعریف که، خروس گو، مو باید گهگمون، بخوسم، سی مهزه ایکه صوا بیچیلم دنیا میان، و حتما باید ور دی بچیل بوم، صوا که بچیلم دنیا اومدن بیو تا پی هم صحبت کنیم تا بینم چه سیت می ترم انجام بدم، خلاصه مُشک از خروسم ناامیداویو، ره وره سگکو، سگکو تا مُشک دی، وش گو، ها می چته؟ چه واویده که ایقه اوقاتت تهله، مشک گو، یه ماری اومده تو چاومون و حتما تا امشو منو می خواره، سگکو گو می زهله ی سرشه، بیو تا بیریم سراغش، یه اودیش بگیرم تا دی از ایی فکرل نکنه، تا خواسن برن سراغ مارکو، که یهمرتوه، مردک بنگ سگکو دا، وش گو بیو تا بریم یه کمه چویی جم کنیم، سی تشمون، سگکو گو، خیلی دلم میخواس کمکت کنم ولی ای نرُم کمکش، حتما یه بلای سرم میاره، وختی واگشتم، حتما میام میریم مارکو صحرا کنیم. مُشک بدوخت وخوش گو، خو ایسو مو چکنم پی ای مار، گو امشو میرم ور بچی خالم تو چندتا چاو اولتره و تا امشو خیری، سر کنم، و صوا دوبارتی وامی گردم تا یه فکری سی مار بکنم. مُشککو ره وو صوا صبو که واشگت، دیی تا همه حیونلکو که داخل خسبیدنه، مردنه، و سگکو فرار کرده پس یه درختی کرآویده، ره ور سگکو، وش گو می چه واویده، گو اُمرو صو که زنک ره تو خس، که سی حیونلکو چی درس کنه، مارکو میگزش و زنک میمیره، مردک نارحتیمو، تفنگش ورمیداره میره تو خس و هر حیونی که جلو چیشش بیا میکشه و منم داخل خس، نبیدم که ای بیدم مُنم کشته ویمدیم. ای کاش همو دیگ، همتی پی هم یه فکر الدی سی مار می کردیم، ولی حیف و صد حیف، و بیو تا از اینجو در بریم، اینجو دیه خونه ماره نه خونه مانه!!!!، بیو تا بریم چاو کناری که خیلی امنه وو ماری هم نداره!!!!-ها ایسو ایی چاوکو، حال مقما مانه و مردم ولالتمون، که نسبت به خوشون و اطرافشون خیلی بی تفاوت آویدنه، و ای کسی هم بخوا یه کاری بکنه هیشکی کمکش نمی کنه و دیه هر کی هر کی واویده و ای ایسو، از خو خرگوشی راس نواویم دیه هیچوقت راس نویمیم!!!!!. ها عامو جون، همه او برده، مانه خو!!!!!!!!/ج