سلام . بازم ما خومونه نگرفتيم و بحساو دس قلم واويديم كه يه مطلب ديه هم بنويسيم . اما ئي كشا ديه واقعا هاسي راس مي گم. اي نظري چي ننهادين، ديه از هفته بعدي منتظر عبدو نبووين. نمي خوام قهر يا ناز كنما. خوتون هم مي فهمين كه ئي طوري كه پاك يكي گپ بزنه و باقي گوش بدن، كار خيلي خيلي خيلي مزخرفيه. مثلا همي كلاسل مدرسه. تو كلاسل مدرسه، مثلا اي به شاگردل اجازه ندن كه گپ بزنن و يا مثلا اي فقط و فقط معلمل گپ بزنن و شاگردل سي خوشون صمُ بكمْ بشينن، ديه ئي چه كلاسيه! چه مدرسينيه؟

خلاصه مي خوام سيتون بگم اي تو ئي مدت عادت كردينه  يا عادت تون دادنه كه فقط شنونده بووين و خوتون هيچ گپي نداشتوين سي زدن، با عرض معذرت بايد بگم كه يه عادت كاملا كاملا كاملا مزخرفيه! شما سيل روزنومه و سايتل بالاسونيل بكنين. مثلا يه مطلبي درباره دي ماروك ميلن تو سايتشون. يه مرتوه مي ويني تا يه دو مليون نفري سيشون كامنت نهادنه و دويس هزارتاش موافقن و شونصدهزارتاش مخالفن و او دويس هزارتا، پُي او شونصدهزارتا كل و كشتيرشونه كه سي چه مخالفين و او شونصدهزارتا هم پُي او دويس هزار تا جر و بحث شونه كه شما سي چه موافقين و خلاصه يك قيومتي برپا ويمو كه نگو و نپرس. بعدش هم يه چن تا كارشناس دي ماروك شناسي كامنت و نظر ميلن و باقي اونايه به صلح و صفا دعوت مي كنن و خلاصه نويسنده مقاله دي ماروك، اصل قضيه ميا دسش و از او به بعد سعي مي كنه كه بختر بنويسه. اما ئي سايتل ما، تو پربازديدترين مطلبش هم كه مي ري، مي ويني تا هف نفر و نصفي نظر نهادنه و نصف ئي هف نفر و نصفي هم زهله شون رفته نظر اصلي شونه بنويسن و او نصف ديه هم كه نظر واقعي شونه نوشتنه، سردبير يا هر كسي كه وش برخارده، يا ئي نظرله تبديل به نقطه چين كرده و يا شي هر كامنتي يه جواو دندون شكني داده كه كامنت نويس بدوخت، ديه اصلا طرف ئي سايت هم نره.

نمي فهمم چه واوي! انگاري خيلي شير تو شير واوي. آخرش نمي فهمم وتون گفتم نظر بيلين يا نيلين. به هر حال منظورم ئي بي كه اي نظر ندين، مونم نمي نويسم ديه. شما نظر بدين، بتا يه نفري زهله كنه نقطه چين شون كنه. باقيش پُي مو ...