غمچو:

نَزیکَلِ چاس بی وُ اَفتو مث خُرِنگِ تَشی زمینِه میسوزوند. یه بادِ داغی هم از ری هَلِ گاراج می اُومِه که لارِ آدمه تش میزِه. دی هِلِیهو زَمبیلِ سوزیشِه نهاده بی پیش ریش وُ هاسِی ریشون اُو میپِشکُوند.
 اُو که میگِرُفت ری سوزییَل، سوزتر و تازه تر ویمیدِن. ریحون و جعفری و تُروَک و کُرّات و نعنا تو زَمبیل بیدِن وُ پرپینَل هم که جَلدتر خِراو وِیمیدِن، نهاده بیدِشون ری یه کلِ کارتِنی وُ ریسَریش هم اُنداخته بی ریشون. بالِ ریسری زرد و چَروْ بی وُ بوُ خاگتِماته میدا که دوش دُرُس کِردِه بی اُما کَروُ زده بی شی تینَک وُ پاکشِه رُخته بی ری غالی وُ یه مُشتیش هم رُخته بی ری ریسریش که کاظوُ وُ کُوووُ بیزونَلِه خُوخُوالو جَعمشون کِردِیدِن وُ وا مینَلِ ری غالی وُ پِرزالِی بالَلِ کُدوکی که چن شو پیش کَروُ پُی تَه باویزَن کُشتیدِش و بِلتَشِ سرِ قیلون که دوش تو مرافِعَه رُختِه بی ری غالی، پاکشونه پِرِنج زدیدِن رُختیدِن ته حلقشون وُ مثِ لوز خاردیدِنشون.
جَرِ کَروُ سَرِ ئی بی که میگفت نِبُیَس هر شوُ هر شوُ چی گیرون دُرُس کُنِی. میگفت مو کجا ایقه پیل دارُم که تو هر شو بُخُی خاگتماتِه دُرُس کنی ! دی هلیهو هم گفته بی چه بِدُمشون نِپِه. ماس و پنیر و آلو خو گیرونتر درمیان _ یه مشتِ دیه هم جَر و مرافعَه کِردِیدِن وُ کَروُ پُی قار و قیَه، چن تا فحش زُشت وُ یه چن نفر دادِی که اِی بُخام بنویسُمشون، هم کَروُ بدوَخته میگیرِن، هم دیه نِمِیلِن دی هلیهو زَمبیلِشِه بَیلِه اُونجوُ وُ کُرّات و تُروَکِشِه بُفورشَنِه وُ هم ممکنه سراقِ خومَم بیان _ دی هلیهو بالِ ریسریشه که خاگتماتِی واویدِی، هُل دا شی کارتن وُ دِکِشا گیرِ اُو پِشکُندَن ری پرپینَل واوی. گیرِ صاف و صیف کِردَنِشون بی که یه ماشین سیِینی بِرَکِش وُویسا وُ رانندَش شیشِی ماشینه کشی دومَن. تا شیشه اُومِه دومن، یَک باد خنکی خارد تو توری دی هلیهو که اُنگار زنده واوی. اُنگار دِنیِیِه دادیدِن وَش. بنظرش اُومِه که بهشت هم بُیَد همچی هوایی داشتو !
مِردکِ دوکارِه ای که مینَلِ جلو سرش رُخته بیدِن، پُی لِواسِ خاکی پشت فرمون نشسِه بی وُ یه عُینکِ سیِی پهنی هم ری چیشِش بی. دی هلیهو گفت بفرما عامو ! مِردک یه سلام لنگی کرد و گفت یه کمِ سوُزی خَردَنی بده. دی هلیهو گفت چشم. وُ گیرِ بُر زدنِ سوزییَل واوی. همیطحر که هاسی دَسّه دَسّه مینهادشون ری هم، مِردک گفت یه خوردِی پرپینی هم بِیل. دی هلیهو گفت ری چیشُم. وُ دس کِرد یه بافِی پرپینی از شی ریسریش دراُوُرد و نها ری باقی سوزییَل. مِردک عُینکشه یه کمی ری چیشِش دومن بالا کِرد و گفت گَرمِت نی عامِه ؟ دی هلیهو گفت چه کنیم ؟ گرممون هم بو. بُیَد یه چن تا تالِ سوزی بِفورشَنُم تا یه قیاسِ ماسی بِتَرُم بُسوُنُم سی کُلی مُلییَلُم یا نه ؟ مِردک گفت خوفِت نَبو، دُرُس ویمو خدابخا. دی هلیهو گفت کِی دیه ؟ وَختی عمر ما سر رَه ؟ مِردک گفت نه، خدابخا هَمی یکی دو ماه آینده دُرُس ویمو اینشالا. بعدش همیطحر که ریحون و پرپینَلِه وُ دسِ دی هلیهو میسِه، گفت آغُی استاندار دستور داده تمومِ رئیسَل وُ مدیرلِ اداره جاته از آدملِ قرآنی بِیلِن. دی هلیهو گفت یعنی چه !؟ مِردک نیلونِ سوزیِه نها ری صندلی بِرَکیش و گفت یعنی ئی که میخا آدملیه ری پست و سمت بِیلِه که قرآنی وُ اهلِ قرآن بوُوِن. دی هلیهو گفت والا ایسو چِل و چن ساله که مملکت دسِ آدملِ قرآنیه خو ! بعدش یه کمی صداشِه آرومتر کِرد و گفت هر آدمِ قرآنی هم، حُکماً چون قرآن میخونه، نمیتره آدمِ دُرُسی بو. تو فیلمِ ایمام علی دیدی همی قرآن خونَل که اسم شون خوارج بی، چه سرِ امیرالمومنین اُوُردِن ؟ دیدی چن تا قرآن سرِ نیزه زدن مقاوِلِ حضرت امیر ؟ بعدِش بالِ ریسریشِه کشی ری پرپینَل و گفت تو همی زمان خومونَم مِی سعید طوسی، نه معلُمِ قرآن بچیَل بی !؟ بعد یه هسکِی گتی دا وُ گفت آغُی استاندار اِی میتَره، چن تا کافرِ ذمی بِیلِه رییس و مدیر اُما کافرِ ذمی که مدیر و مدبر و عادل بو وُ بفهمه که میخا چه کنه وُ هَمِی مردمه پُی یه چیشی بِوینِه وُ سیش فرق نکنه که چه کسی چه دین و مذهبی داره. مِردک یه سویل خندِی کِرد و گفت عامه، دِلِت خیلی پُرّا ! دی هلیهو گفت کجاشه دیدیه ! مِردک شیشِی ماشینه کَشی بالا وُ رفت. پُی رفتنِ ماشین، لیمِ بادِ خنکی هم که می اُومِه، پاش رفت. دی هلیهو هَنی نِنِشِسِه بی پُی زَمبیل که کَروُ پُی موتور بالِی سرش وُویسا وُ گفت رُب ساعته که شی اَفتو وُیسیدُمه تا مشتریت بِرِه. بعدش تندتر گفت جَلدی جَعم و جور کُو تا بِرِیم که هاسِی بُک میگیرُم وُ گرما. بعدش یه سیلی وُ پلاکِ سرخ ماشینی که تازه سوزی اِسَدِی وُ هاسِی میرفت، کِرد و گفت چه میگفت ئی مِردَک که ایقِه طولِش دا !؟