غمچو:

بعضی وَختَل آدم وختی خوسیده، تو خُوْ اُنگار که بیدارتر از بیداریه! یه چی واقعینی میوینه مثلاً که تو صدهُزارتا بیداری نمیتره بِوینش. یا مثلاً یه حرفی تو خُوْ میفهمه که ای هُزارسال هم شوروزک کرده بی و نخوسیده بی، نمیتَرِس وش برسه ... _ باشه، میگُم الآنه یا ... نشسّه شی زِکُم کِلَکو و هی میگو بوا، باقی هفته‌ قبلی چه واوی ! _ میخوام بگم ئی حرف دُرُسی هم نی که هی میگن بیدار واوو وُ خُوْ نِرِه ...

 خا، کجا بیدیم؟ ها ، عرض کردم که حسین کَلمُرتضا تلیفون کرد وَم که بِرُم ولات. او، جمعَه زنگ زده بی، مو یَکشنبه پسینش رفتم ولات. یه سلوم و علیکی کردیم و گفتم خیره خدابخا. گفت فلانی، تو غَریوِه نیسی. خوت میفهمی که عاموت عام عُواس هر سال ایمام ویمیده و تعزیه میخونده. اُمسال مو نمیفهمُم چه وَشآویده که می گو نمیخوام تعزیه بخونم. هرچی هم گپ زدیمه پاش، فویده ای نداره که نداره.

گفتم خو باقی دیه چه؟ گفت باقی دیه هم پاک دیم شون دم دیم عام عُواس بسّه. میگن ای عام عُواس اومه، مانَم هسیم، ای نیا، مانم نزیکِ تعزیه نویمیم. هیچی، سوار واویدیم رفتیم خونه‌ی عام عُواس تا یه چن تایی مالِ زیارت هم مهمونشن. نهادیم تا مهمونل رفتن و بعدش گفتم عامو والا، یه ولاتیه وُ یه تُنی. تونَم خو همیشه جونت و عمرت تعزیه و ایمام حسین بیده. مِی چه واویده که اُمسال نمیخوای بخونی؟

عام عُواس یه هسکه ی گتی دا وُ گفت عاموجونی والا، یه خُووی دیدُمه اما سی هیشکی نگفتمه. سی زَناموت هم تعریفش نکردُمه اما خو ایسو که تو زحمت کشیدیه ایقه رَه اومدیه، نمیترم نِگُم سیت. بعدش یه سیلی وُ حسین کَلمُرتضا کرد و گفت یه ده دوُازه روز قبل از ئی، یه پسینی خوسیدیدُم، خُو دیدُم تا اُنگار تو یه باغ گُتی هاسی میگردُم. یه مَرتِوِه مرحوم کَلمَحسینه دیدُم تا هاسی میا. قیافه اش مث همی وختی بی که رحمت خدا رفته بی. تا رسی بِرَکُم، خندس و گفت عُواس بیو تا بریم یه چی نشونت بدُم. گفتم کَلمَحسین، اینجو کجایه ؟ گفت بهشته نه ! بعدش دسمه گرُفت و رفتیم تا رسیدیم یه گُلی که هاسی تعزیه میخوندن. پاک شبیه خونَل شون نورانی بی توریشون. پرس کردم کی هسن اینا ؟ کَلمَحسین گفت اینا پیغمبرل و ایمامَلِن! پُرس کردُم تعزیه ی چنه میخونن !؟ گفت همه‌ی پیغمبرل و ایمامل و هفتاد و دو تن هاسی تعزیه ی شمانله میخونن و سیتون میگِروِن. بعد عام عُواس دواره یه هسکه ی گتی دا وُ گفت خیلی معنا داره عامو. خیلی. ئی حرفه که زِه، نه مو و نه حسین کَلمُرتضا دیه گپ سیمون نوْمِه...